90 нчы еллар башында барлыкка килгән “Ак калфак” иҗтимагый оешмасы җитәкчесе Камәрия Хәмидуллина рәислектән китәргә теләк белдергән. 28 гыйнварда Шиһабетдин Мәрҗани исемендәге Татар гимназиясенең актлар залында уздырылачк оешма җыелышында яңа җитәкче буларак ТДГПУның рус филологиясе факультеты деканы Резеда Мөхәммәтшина кандидатурасы тәкъдим ителүе көтелә. Шулай ук бу көнне “Ак калфак” президиумының яңа әгъзаларын сайларга җыеналар, дип яза «еТатар», tatar-islam.ru агентлыклары.
«Ак калфак» Казанда 90 нчы еллар башында Бөтендөнья татар конгрессы канаты астында оештырылган иде. Аңа журналист, җәмәгать эшлеклесе, ТР Дәүләт Советы депутаты Роза Туфитуллова нигез салды һәм беренче 10 елда бу оешманы җитәкләде. Бүгенге көндә оешманың татарлар күпләп яшәгән төбәкләрдә филиаллары эшли.
