Татар әдибе, журналисты, актеры, режиссеры Хөсәен Габдүшнең тууына 110 ел (1901 – 1941)
Хөсәен Рәхимҗан углы Габдүш Троицк каласында мөгаллим гаиләсендә туа. Яшьли ятим кала. Бабасы Мөхәммәдвәли Ибраһим тәрбиясендә үсә. Октябрь инкыйлабыннан соң Маньчжуриягә күчеп китә. 1919 елда инде аның Харбинда яши башлавы мәгълүм. Ул Кытайның, Япониянең кайбер шәһәрләрендә дә була. Гәүдәсе Харбинның татар зиратына күмелгән.
Хөсәен Габдүш Ерак Шәрыкта мөгаллимлек кыла, татарча төрле газет-журналларда эшли, мәдәни чараларны оештыруда актив катнаша. Г.Камал, М.Фәйзи, Г.Исхакый һәм кайбер башка татар драматургларының әсәрләрен сәхнәләштерә, аларда төп рольләрне башкара.
Х.Габдүш әсәрләре чит илләрдәге төрле газет-журналларда (“Ерак Шәрык”, “Яңа милли юл”, “Милли байрак”, “Чаткы”, “Казан” һ.б.) басылган. Хикәяләре, пьесалары, шигырьләре дә бар. 1931 елда Токиодагы “Матбагаи исламия”дә Х.Габдүшнең гарәп хәрефләре белән “Дүрт хикәя” исемле җыентыгы басылып чыккан.
