ВТБ Бердәм лигасы һәм Профессиональ баскетбол лигасы (ягъни Россия чемпионаты) ярышларында бер-бер артлы көчле көндәшләрен отканнан соң, “УНИКС” үзе чыгыш ясый торган өченче бәйге – Европа Кубогында да җиңү яулады. Ярышларның икенче этабының беренче очрашуында казанлылар үз тамашачылары каршында Испаниянең “Гран Канария” командасын кабул итте һәм көндәшләрен 67:64 исәбе белән ота алды. Әйтергә кирәк, ике команда да алдагы этапта үз төркемнәрендә беренче урыннарны яулаган иделәр. Димәк ки, бу этапта да алар шуны ук эшләргә омтылачак. Әлегә бәхет казанлыларга елмайды. Дөрес, шунысын да искәртү сорала: көндәшләребез Казанга шактый авыр юл үтеп килделәр, юлда гына да алар ундүрт сәгать вакытларын уздырган. Әлеге факторны хәтта безнекеләрнең баш тренеры Евгений Пашутин да искәртте. Шул ук вакытта “УНИКС” баскетболчыларының да соңгы вакытта бик арыганлыкларын әйтү кирәк. Ни генә әйтсәң дә, ЦСКА, “Химки”, “Летувос Ритас” - бөтен Европада танылган көчле командалар бит. Ниһаять, испанлылар белән уеннан соң спортчылар бер көнлек ял алдылар.
Шул рәвешле, “УНИКС” унберенче тапкыр рәттән җиңү яулады (шуның бишесе – яңа елда). Европа Кубогының алдагы уенын якташларыбыз 25 гыйнвар көнне Хорватиядә җирле “Цедевита”га каршы уздырачак.
Ә ул арада алдынгы уенчыларыбызның берсе Марко Попович та тиздән командага кушыла алачак. Баш тренерыбыз белдергәнчә, декабрь аенда кулын җәрәхәтләгән спортчы дәвалау курсын тәмамлап килә икән. Димәк, көчебез тагын да артачак дигән сүз.
