Яр Чаллы дәүләт курчак театры артисты Дилүс Хуҗиәхмәтов яшь булуына да карамастан, коллективның әйдәп баручы актерларыннан санала. Шушы арада егет бер-бер артлы котлаулар, тәбрикләүләр кабул итә. Казанда узган “Тантана” театраль премиясенә лаек булган бу егетне башка җирдә очратсам һич кенә дә курчаклар уйнатадыр, дип уйламас идем. Яшь, чибәр, өстәвенә, татар телен су урынына эчә. Мондый артистны Казан театры сәхнәләрендә дә сирәк күрәсең бит. Җәһәт эңгәмә барышында артист егетнең тырышлыгын тиз тоемлап өлгердем.
