«Җенлек йортка тимәгез!» язмасында авылыбызда гомер иткән җенле карчык турында язган идем. Бүген тагын бер җенле вакыйга турында бәян итәргә телим. Безнең авылда озак еллар буе челтерәп аккан чишмә бар. Бөтен авыл халкы гомер буе шул чишмәдән су ташыды, уңган киленнәр чишмә улагында кер чайкады, бала-чага бәбкәләр саклады. Көндез чишмәдән халык өзелмәсә, төнгә каршы анда беркем дә калмый иде. Чөнки чишмә — җенле урын, анда төнлә җеннәр йөри, дип сөйли иде халык.
