«Тантана» еллык театраль премиясенең нәкъ менә Халыкара театр көнендә тапшырылуы артистлар өчен икеләтә бәйрәм булды. Г.Камал театры бинасына аяк атлау белән монда чын бәйрәм рухы хөкем сөргәнлеге үзен тиз сиздерде. Бу кичтә әлеге олуг затлы бинага Татарстанның барлык театр коллективларыннан да вәкилләр килгән иде. Гадәттә, тамашачы хакына фида ителүче затлар, бүген үзләре кубарылып ял итә, күңел ача. Күптән күрешмәгән сабакташлар, коллегалар, бер-берсенең хәлен сораша, иҗади планнары, яңалыклары белән уртаклаша. Фойеда тере музыка яңгырый. Кунак булып килгән һәрбер артистны музыкантлар залга озата. Ә анда - “Тантана”. Театр артистлары тантанасы...
